Máis de 80 persoas, entre elas 40 mergulladores, e 18 barcos, participaron nunha xornada de voluntariado ambiental na contorna dos Guidoiros Areoso e Pedregoso, convocadas por Afundación, a Obra Social de ABANCA. Esta é a novena acción desenvolvida nesta zona no marco do proxecto PLANCTON, que permitiu retirar xa máis de 150 toneladas de lixo mariño dos fondos e areais de Galicia.
As embarcacións participantes partiron a primeira hora da mañá do porto de Xufre, na Illa de Arousa, e trasladaron ás persoas voluntarias á contorna dos dous illotes para iniciar os traballos de retirada de residuos, tanto nos fondos mariños como nos areais. Tras a pesada final coa que concluíu a actividade de regreso ao porto, a balanza reflectiu máis de 1800 quilos de residuos. Nas 9 ocasións nas que se traballou nesta zona desde o inicio de PLANCTON en 2021, o voluntariado logrou retirar case 12 toneladas de lixo mariño.
Participaron nas inmersións mergulladores da Confraría de Pescadores de San Xulián da Illa de Arousa, e mergulladores dos clubs de Mergullo Ons, Palmira Scuba, A.D.C Raspa e Terra dous Mares, coordinados polo Club Subacuático Pérez-Sub, cuxos membros na súa grande maioría pertencen tamén á Asociación Galega de Pescadores Submarinos Responsables,. Durante dúas horas retiraron dos fondos aparellos de pesca extraviados durante o exercicio desta actividade, entre eles, fundamentalmente, grandes marañas de redes, nasas e cabos e pneumáticos.
Un segundo grupo de persoas voluntarias desembarcou no illote Pedregoso onde recolleron tamén restos de cordas e cabos, nasas ou restos de poliespán. Pero nesta ocasión, o máis significativo foi o gran número de botellas de plástico localizadas no lugar, un 95 por cento dos residuos recolleitos hoxe na superficie dos illotes.
Tal e como establece o ODS 17 (Alianzas para lograr os obxectivos), ademais das persoas voluntarias que traballaron na retirada de residuos nos fondos e areais, a xornada de voluntariado ambiental contou coa colaboración doutra serie de entidades tanto públicas como privadas: o Servizo de Patrimonio Natural de Pontevedra da Consellería de Medio Ambiente, o Servizo Marítimo da Garda Civil, a Federación Galega de Actividades Subacuáticas, Dragados Osmar, Edelmar Tres e Descargas J.C. Viñas e Hijos. Ademais, o Concello da Illa de Arousa colaborou tamén coa actividade facéndose cargo da xestión final dos residuos retirados ao longo da xornada.
Tras esta nova actuación de voluntariado, retiráronse xa máis de 150 toneladas de diferentes enclaves ao longo de toda a costa galega no marco deste Plan de Conservación Territorial, que estende as súas actividades durante todo o ano. Un proxecto que forma parte do compromiso de ABANCA e a súa Obra Social cos Obxectivos de Desenvolvemento Sostible, especialmente cos ODS13 Acción polo clima, ODS14 Vida submarina e ODS17 Alianzas para lograr os obxectivos, un proxecto co que pretenden ademais chamar a atención sobre a necesidade de cambiar e mellorar moitos dos nosos hábitos de comportamento no medio, para asegurar o uso e goce dos recursos ás xeracións futuras.
