Mergulladores e mergulladoras da Confraría de Pescadores de Vilanova de Arousa e do Club Subacuático Pérez-Sub, varios deles pertencentes á Asociación Galega de Pescadores Submarinos Responsables, participarán nunha xornada de limpeza submarina en augas de Vilanova de Arousa, no marco das actuacións de voluntariado e conservación do medio mariño promovidas por Afundación no seo do programa PLANCTON.
Ao longo da xornada, os bucios que tomarán parte da actividade mergullaranse en diferentes puntos do litoral dentro da zona de explotación marisqueira da confraría, concretamente entre o Con de Tres Picos e a Punta das Sinas, onde procederán á retirada de residuos acumulados nos fondos mariños, fundamentalmente útiles e aparellos relacionados coa actividade pesqueira que, tras perderse e ser arrastrados polas mareas e os temporais, acaban depositados nos fondos baixo a superficie, podendo chegar a poñer en situacións de risco tanto a propia riqueza destes ecosistemas mariños como para a propia actividade pesqueira.